miércoles, 4 de abril de 2018

Villamayor (Piloña) - El Chorrón - El Tombu - Valle

27 de Xineru de 2018

Track: Villamayor (Piloña) - El Chorrón - El Tombu - Valle


Siguimos pel mes de Xineru, nesti iviernu dafechu anormal, en comparanza colos caberos años, ya que tamos teniendo un iviernu de los de verdá, de los de ñeve y lluvia a fartar. Poro, nun día pelín gafientu, con poques posibilidaes de tener bones vistes, nun paga la pena metese una xabazada de ruta lluchando col mantu nival.

Lo meyor, ye tomáselo con calma y dedicase a facer rutines seliquines nos que conocer dalgún requexín d'Asturies que tengas na tiesta. Nesti casu, sigo pelín empeñaú en siguir faciendo monte per Piloña, ya que paezme un conceyu con grandísimes posibilidaes y quiciás queda arrequexáu polos conceyos vecinos de Ponga y Casu.

Partimos de Villamayor ( m)

Ensín más, xuntarémonos en Villamayor, dellos allegaos al grupu y númberu probe de miembros del grupu, que nesta temporada ta siendo un vezu, ruta tres ruta. Asina ye difícil motivase a buscar grandes actividaes pel monte si la xente nun ye a entrenar no cenciello siquiera.

P'aportar a Villamayor, nel conceyu piloñés, saldremos de Xixón pela minera, hasta l'empalme cola autovía'l Cantábricu, saliéndonos en Llieres pa cruciar el conceyu de Nava hasta entrar en Piloña, por Curuxéu, pa pasar al llau de L'Infiestu, siguiendo N-634 per L'Horrín hasta entrar en Villamayor, onde almorzaremos y aparcaremos na plaza siguiente al cruce pal pueblu de Rodiles.

Facemos el tranquilu percorríu que llévanos a conocer el Chorrón

Ellí, garraremos camín pente les cases de Carúa, hasta aportar a la pista que nos llevará tranquilamente a la vera'l ríu Pequeñu, nun guapu paséu que percorre'l PR que tien d'amosanos una pequeña ayalga, como ye'l Chorrón.


Esti camín, tan cenciellu como guapu, fadrános conocer esti tabayón, que nel intre, baxaba col calce casi xabaz, lo cual daba un puntu d'aciertu al escoyer esti paséu. Magar de sacar les correspondientes semeyes, cuando tuvimos oportunidá, por mor d'un grupu numberosu de montañeros siguiremos col nuesu percorríu.

Ascendemos colgaos sol valle'l rigu Pequeñu hasta la Cueva

La idega ye siguir penriba'l Chorrón, pa empobinanos per un guapu senderu que dirá xubiendo altor, pa dexar mui abaxo, encaxonáu pente les falderes del Cerru'l Tombu y la xerra de Pesquerín, al rigu Pequeñu.

Esti tramu, sedrá pa mí, de los más guapos, cola pena de nun tener meyores vistes, con un día tan atristayáu, pero caleyar per estes siendes colgaes, siempre presten y más si tienen el so destín hasta un pueblu abandonáu como ye'l de la Cueva.

Travesamos el pueblu escaecíu de la Cueva p'ascender hacia'l Tombu

Pasiaremos pentes les esbarrumbaes cases y como non, visitaremos la cueva que-y da nome, demientres camentamos la dureza de vivir en llugares como esti. Nun tamos falando de Llué, pero sí que tenemos presente'l camín a facer dende Villamayor, probablemente a diariu.

Llueu de dexar atrás la cabera casa de la Cueva, enantes d'aportar a la Collada, decidimos garrar un recuestu pente árboles que tien de facenos ascender hacia'l Tombu, la que será la nuesa mayor cota na ruta de güei.

Ascendemos per monte baxo hacia'l Tombu

Ensin mayor problemes, superaremos el desnivel restante, llibrando como meyor se pueda los tramos onde'l senderu traviesa cotoyes y escayos, hasta aportar a la llanura que ye esti monte del Tombu, faciendo tol patéu pela so cumera a la gueta del puntu más altu.

Alcontrarémoslu a los 673 m d'altor, coincieendo con un finxu de piedres y un sobrante belén de cumes, que como non, retiramos y nos toca baxar, na mochila, evitando dexar más basoria artificial nos nuesos montes.

Pasiamos per tola llanura del Tombu (673 m) hasta'l picu L'Arbolín (658 m)

Nun son, nin una, nin dos... nin diez, les vegaes que nos toca tirar al contenedor toles figurines que dalgunos grupos de monte tienen a bien, xubir y dexar hasta nun se sabe cuando na cumera nos montes.

Tamos a finales de Xineru y eses fiestes navidiegues que nun tol mundu tien por qué cellebrar ya pasaron cuantayá. Lo mínimu, ye xubir de nuevu al monte, namás pasar les fiestes y recoyer tol Belén de marres o meyor aún, xubilo, facer la semeyina y quitalo nel intre, que nun tenemos porque los demás alcontrar toa esta triba de simboloxía caduca.

Descendemos hacia'l rigu Valle pel mayau'l Gaiteru

Ensín más, tamién averámonos a la punta oeste del Tombu, onde topámonos con un árbol plantáu, artificialmente, atáu con cables y nun se cuantos trastos más... paez nomase'l picu L'Arbolín (658 m) y otra tradición ensín xacíu fae llantar esti trozu inerte d'árbol nel so cumal.

Facemos la semeya de rigor, nesti cumal y siguiendo cola ruta, descenderemos a pinchu hacia'l mayau'l Gaiteru, onde hasta nun fai munchos años, enteréme que vivía un paisanu. Pocu más abaxo, enllazamos cola pista que vien dende la cabaña de la Collada y descenderemos ya hasta'l rigu Valle, travesando de primeres la ponte los Ciegos.

Empobinámonos hacia'l pueblu de Valle

Una vegada más, descenderemos tranquilamente per bona pista formigonada pa conocer la parte más enfozada del rigu Valle. Pente les estribaciones del picu Coroña y el Tombu, diremos caleyando pasando al llau de molinos hasta travesar la ponte Les Melendreres, p'ascender dellos metros hacia'l pueblu de Valle, onde nel barriu del Mecín, pararemos a xintar el pinchu.

Magar del parón y col día estropiándose dafechu, siguiremos camín ya per pista hasta'l pueblu de Melardi, el cual cruciamos, pa siguir baxando per carretera, marcada de GR, hasta casi la N-634, onde alcontramos un camín paralelu a la carretera pela que llibraremos de caleyar xunto a los coches hasta Villamayor.

Pasaremos per Melardi de camín a Villamayor

En resume, siguimos faciendo rutines curties nesti iviernu tan crudu, qu'al menos nos faigan salir de casa. Nesta, tuviemos caleyando durante 4 hores y 40 minutos pa percorrer los 12.8 km superando un desnivel positivu de 610 m.

Pero como siempre... los datos son símplemente datos, lo meyor ye siguir conociendo requexos d'Asturies y compartir hores de camín con bonos collacios, pertenezcan al grupu de Xuan de la Borrina o non.

4 comentarios:

  1. Guapa rutina. Lo de baxar los componentes del belen, todo un ejemplo, que muchos deberiamos hacer.
    Saludos

    ResponderEliminar
    Respuestas
    1. Gracies Sebas... son ya munchos años teniendo que retirar belenes axenos. Una vergoña

      Eliminar
  2. Bonita propuesta Berto que no conocemos, pero que pasa por sitios con mucho encanto, como el Chorrón, espectacular con este invierno. La guardamos para hacer con Dardo que tanto disfruta cuando hay agua cerca. Un abrazo para Kila y otro pa`ti!!

    ResponderEliminar
    Respuestas
    1. Ye un paseín prestosu... y pue dar munches posibilidaes a rutes más llargues. Un abrazu

      Eliminar