martes, 3 de octubre de 2017

Vixidel (Teberga) - Picu Baxinas

17 de Setiembre de 2017

Track: Vixidel (Teberga) - Picu Baxinas


Entamamos temporada montuna y un añu coincide'l finde cola maratón d'escalada de Quirós, asína que toca restolar nel llibretu de montes pendientes p'alcontrar daqué afayaizu per esta fastera. Esta vegada vínome a la tiesta conocer el valle de Cualmundi dende Vixidel y de pasu xubir al picu Baxinas.

P'aportar al pueblu de Vixidel, como saldríemos de Xixón pela Y griega hasta Uviéu onde tomaríemos l'autovía hacia Grau, desviándonos pal valle'l Trubia, perpasando los conceyos d'Uviéu, Santu Adrianu y Proaza.

Partimos del pueblín de Vixidel (704 m)

En Caranga Baxu, desviámonos hacia Teberga, pa dempués d'un almuerzu na Plaza siguir camín pela Te-1 hacia'l Altu de San L.lourienzu, desviándonos a la manzorga en Vil.lanueva hacia'l nuesu destín: Vixidel.

Ellí, preparámonos la xente del GM Xuan de la Borrina, esta vegada pelín escasos. Menos mal qu'animáronse delles collacies escaladores y ficimos un grupín pelín más curiosu. Ensin más, saldremos de Vixidel pente los caleyos del pueblu y aína taremos ya metíos na pista que va empobinanos al valle de Cualmundi.

Empobinámonos hacia'l preciosu valle de Cualmundi

La pista ye bien guapa y entrenida de facer, siempre pente grandes exemplares de castañales, carbayos... y siempre col soníu del ríu Cualmundi, que pesie a la seca d'esti añu, aún aguanta con bien d'agua p'amosanos pequeños saltos y guapes poces.

Nun tendremos perda, hasta los Tablaos, onde per un llau aporta un camín dende Vil.launel y per otru llau la nuesa pista fai envuelta qu'aportaría a la braña de la Rebel.lá. Nós tendremos de siguir un claru senderu siempre valle alantre teniendo de cruciar el ríu en dalgún puntu, pero siempre cenciellu de siguir. 

Siguiremos valle arriba hasta pasar al del Tornu

Nel tramu final de Cualmundi, abandonaremos l'abellugu de les fayes y meterémonos per monte baxo, que taba recién quemáu, lo cual facilitó l'avance pero facía alcordanos de la fola d'incendios provocaos que tenemos de soportar n'Asturies.

El casu ye que siguiremos valle alantre ya ascendiendo de llau de la riega Tornu, ya que la de Cualmundi dexarémosla a la nuesa mandrecha y según vamos ganando altor, tendremos la presencia de la Pena Prieta tres de nueso.

Ascenderemos a los Chanones pa bordialu hacia'l Baxinas

Aportaremos a un colláu de 1331 m dende'l cual pudiéramos descender a les brañes teberganes de Barriu y Cuña, pero nel nuesu casu, vamos empobinanos hacia la llomba de les L.lanuces, la cual bordiaremos pela mandrecha pa empatar col colláu que nos pon en dimposición d'atacar el nuesu oxetivu: El Picu Baxinas.



Guapa y tranquila crestería pel picu Baxinas

El grupu va como un cañón asína que mándolos siguir alantre y quédome con Benjamín que nun s'alcuentra mui allá y tien un pequeñu baxón d'azucre. Cuando recupera, vamos garrando ritmín y ganámos-y la crestina al Baxinas, p'acabar por encumar los sos 1513 m.

Cume nel Picu Baxinas (1513 m)

El día ta pelín repunante, con muncha ñube y males vistes, asina que toca agospiase pente les peñes pa evitar el vientu y ponémonos en mou xinta. Una vegada que tamos dalgo fartucos ponémonos en marcha de nuevu siguiendo'l crestéu hacia'l norte col envís d'averanos a media faldera hacia un mayáu que vemos a la lloñe.


Descendemos hacia'l colláu Cancéu (1330 m)

Aportaremos al mayáu Cancéu (1330 m) onde los compañeros de Las Claras tendríen un pindiu descensu hacia les pistes que les llevaríen a Vil.launel. Nós, miramos la xugada y anque sabemos qu'enllazaríemos con Vixidel, preferimos conocer la preciosa viesca que tenemos xusto na nuesa direición.

Nun-y damos munches vueltes y garramos una val.lina penmediu la viesca, siguiéndola per onde topemos traza senderu o simplemente meyor vemos l'avance. La verdá ye que-y falta un pelín a la seronda y danos casi pena de nun pisar la fueya fonda d'estes fayes delles selmanes más tarde.

Descendemos pela viesca de Buscafríos ensin senderu

Al final, la nuesa intuición triunfó y aportamos al final de la val.lina, atopando dalgo de camín empredráu y xustu al final d'ésti, el depósitu d'agua de la Mortera de Vixidel. Tamos xusto onde queríemos faciendo una circular guapa y quedando mui cerquina del pueblu... pero... nun miro bien el gps y la cago.

Esto ye qu'envede tirar nel camín a la mandrecha pa descender pela mortera y restolar un camín que nos baxase a Vixidel direutu, nun sé por qué equivoquéme mirando los tracks y cuando quíseme dar cuenta tábemos nel camín que bordea tol picu Baxina pente Vil.launel y Cualmundi.

Aportamos a la Mortera de Vixidel y dende ehí hasta'l pueblu

Resultáu? Cagada fina y vuelta innecesaria hasta los Tablaos, onde tornamos a baxar pela pista del val.le Cualmundi, con un solín y calorín prestosu, pero con dalgún kilómetru de más nes pates. Dexo nel track los miós camientos pa descender dende la mortera a Vixidel, pero nun ye un track fiable, ya que ta pintáu sol mapa.

Al final, con un estra inesperáu y ensin conocer la incógnita que tenía pente la Mortera y Vixidel, aportamos de nuevu al pueblu dempués de 5 hores y 50 minutinos de ruta, nos que superamos un desnivel positivu de 1430 m y 11,5 km de percorríu.

Camudando'l Camín per Teberga

No hay comentarios:

Publicar un comentario