Puebla de Liyo (Porma) - Susarón

10 de Xineru de 2014

Track: Puebla de Liyo (Porma) - Picu Susarón

Dende que fuéramos a esguilar a la escuela de Redipollos a Pau y a mí, prestáranos muncho la presencia del Susarón, poro pal añu siguiente Pau decidió poner esti monte pente les sos rutes a escoyer nel GM Xuan de la Borrina.

Con esti xacíu, plantarémonos na Puebla de Liyo en Llión, magar d'un viaxe al traviés de l'autovía minera hasta Mieres, onde garramos la autovía A66 saliéndonos na salida de Morea, pa percorrer la As 112, hasta Cabanaquinta onde magar del almuerzu, siguimos hacia'l Puirtu Braña pa baxar hasta'l conceyu llionés de Liyo perpasando per Isoba enantes d'aportar a la Puebla.

Partimos de la Puebla de Liyo (1147 m) col Susarón al fondu

Puertu Ventana (Teberga) - Pena'l Ranchón

21 d'Avientu de 2014

Track: Puertu Ventana (Teberga) - Pena'l Ranchón

Son les diez menos venti de la mañana y tamos nel Puertu Ventana, na llende de los conceyos de Teberga y Quirós y del llionés Santumil.lanu. Magar d'unos díes de ñevaes continuaes, plantámonos nesti puertu de casi 1600 m d'altor pa da-y un intentu a la Pena'l Ranchón.

Atrás quedaron km de carretera dende Xixón, garrando l'autovía a Grau, pa salir hacia'l valle del Trubia y travesar los conceyos de Santu Adrianu, Proaza y nel pueblu de Caranga Baxu, tomar direición a Teberga entrando n'él pol pueblu d'Entragu, hasta parar na capital tebergana de La Plaza.

Magar de llenar l'estómagu, pondrémonos en marcha hacia'l puertu Ventana pasando pelos pueblos teberganos de Las Veigas, Riel.lu, El L.lanu y Parmu antes d'atacar la parte final del puertu, onde nes sos caberes ramples alcontraremos xelu, amosando lo frío d'estos díes.

Semeya de grupu nel Puertu Ventana (1582 m)

La Puela (Ayande) - Altu'l Palo - La Marta - Picu Cimeiru

7 d'Avientu de 2014

Track: La Puela (Ayande) - Picu Cimeiru

Tornamos al occidente magar d'un tiempín ensín pasar per ellí, pa face-y una visitina a los ayandeses Rebe y Pangua, col envís de conocer un pelín más esos montes qu'abelluguen la capital del conceyu d'Ayande: La Puela.

P'aportar a la Puela, saldremos de Xixón pela autovía A-66, pa garrar la de Grau hasta'l final, onde empobinámonos siempre hacia Cangas del Narcea pela As-15 hasta unos pocos kilómetros enantes de la capital, onde cruciamos la ponte L'Infiernu, garrando la As-14, pasando pelos pueblos ayandeses de la Ponte L.linares y Ruvena, hasta arribar a la capital del conceyu.

Salimos pel camín de Santiago dende la Puela (545 m)

Rocódromu del Molinón - Dock39 (Xixón)

6 y 9 d'Avientu de 2014, 17 de Febreru, 20 y 22 de Marzu de 2015

Durante esti llargu iviernu fueron munchos los díes qu'entrenamos en rocos. Unos díes fuimos al de Mataxove, otros a Llugones ya inclusu dalgún día fuí hasta la Felguera a mediudía a da-y un puquiñín de caña al cuerpu.

Pero la novedá d'esti añu, fué'l roco del Molinón montáu pola empresa top30 y nomáu Dock39. Hai que dicir que ye una especie de sala de xuegos pa neños, onde organícense cumpleaños, hai chigre y dan cursinos d'iniciación, asina que con eses premises díbemos conocelu.

Alberto na cueva de bloque

Arenas (Cabrales) - Forcáu'l Cuernu - Cáraves (Valle Altu de Peñamellera)

22 de Payares de 2014

Track: Arenas (Cabrales) - Forcáu'l Cuernu - Cáraves (Valle Altu de Peñamellera)

Una vegada más, tornamos pal oriente y nesta ocasión vamos facer una travesía pente los conceyos de Cabrales y el Valle Altu de Peñamellera. El nuesu puntu de partida va ser n'Arenas y percorreremos el cordal de H.uanrobre hasta'l pueblu de Cáraves nel Valle Altu, ascendiendo al picu'l Forcáu'l Cuernu.

Como siempre que vamos pa Cabrales, garraremos l'autovía del Cantábricu hasta Posada de Llanes onde tomamos direición a Cabrales al traviés del Altu d'Ortigueru, pa llueu baxar a los pueblos de Canales, Carreña, Poo y a la fin Arenas, onde magar del trasiegu de coches ente pueblos, almorzamos nel café Cares.

Semeya de "semi grupu" caleyando col cordal de H.uanrobre detrás