miércoles, 17 de enero de 2018

La Güeria d'Urbiés (Mieres) - Picu Tres Conceyos

3 d'Avientu de 2017

Track: La Güeria d'Urbiés (Mieres) - Picu Tres Conceyos


Nevadona perimportante y día pelín más gafu de lo esperáu, poro intentar ascender dalgún monte d'altor ensin les condiciones afayaices... nun tien xacíu. Asina que, como siempre, tiramos de la carpetina de pendientes, echámos-y una güeyada y vemos que'l Picu Tres Conceyos, pente les cuenques del Caudal y Nalón, taba esperándonos.

Muncho más guapu de facer con ñeve, salimos dende Xixón pela minera p'almorzar en Mieres. Ellí, axuntámonos y siguiremos camín per Figareo hacia'l Val.le Turón, pasando pelos pueblos de Peñule, Cortina, Cauxal, Turón, El Llegu, La Rebaldana, Santandrés y ya dempués d'unes envueltes a Urbiés y un pelín más alantre, La Güeria.

Partimos dende'l pueblín de la Güeria (665 m)

viernes, 5 de enero de 2018

Penón de Ventana (Teberga)

 Xunetu de 2017

Ún d'esos díes de Xunetu nos que pinta que nun se va poder soportar el calor, decidímonos a xubir hasta'l Puertu Ventana, onde hai delles víes d'escalada nel atrautivu Penón de Ventana. Son munches les rutes de monte que fice dende esti puertu, pero nunca me fixara na calidá de la so caliza pa la práutica de la escalada.

El casu ye qu'abriéronse delles víes y nel puertu, siempre tira una brisina que déxate esguilar y non como nel valle que pegaba fuerte dende les primeres hores de la mañana. Amás de too esto, penriba del Penón, tenemos una serie de grandes bloques y los callexones pente elles son frescos y siempre hai dalgún puntu a la solombra pa trepar.

Aparcaos na pista de Torbaniel.lu

Nun hai croquis d'esti llugar, pero así sobre la marcha, tuviemos esguilando un V/V+ de plaquina onde ya notes como la caliza tien otru tastu, más alpinu. Llueu pasamos a un 6a más llargu de placa, que ye tamién mui buenu, con pasinos finos durante tol percorríu de la vía.

Magar de calecer les manes... metímonos a la solombra, a facer una vía con salida a bloque puru que saldrá sol 6b+ y que dempués del apretón, toca andar finu na parte alta, si nun quies tener repetila y que sáltensete les vieles cola entrada de nuevu jeje.

Vista del Penón de Ventana dende baxo

Al llau del 6b+ bloqueru, tenemos un par de plaques finísimes que saldrán como 7a y 6c+, encadenando al segundu pegue'l 7a, esfrutándo munchísimu de la vía. La que se supón más cenciella, pa min, paecióme hasta más dura, con un pasu rarísimu de lleer, teniendo que colar ensin encadenala, dempués de tres o cuatru pegues durísimos.

Cola espalda contracturada magar de los pegues al 6c+/pa su puta madre por mi parte, aparqué les ganes de siguir probando víes. Aún así, na placa a la mandrecha del 6a salen otru par de víes que serán pente'l 7a+ y el 7b que nun llegamos a probar pero teníen mui bona pinta.

Vista ablucante del Penón de Ventana dende riba

Y como non... l'ayalga del seutor... ta na semeya que vos amueso xusto enriba. Esi desplome tien dos o tres víes si alcuérdome bien, que de xuru un par d'elles son octavos y la de más a la mandrecha debe andar pente'l 7b+ y el 7c.

N'aquel día nun m'atrevía a meteme, pero tou escalador que se precie tien que probar esa vía na so vida, sólo poles semeyes que te pueden sacar con esi desplome tan brutal. La verdá ye que tamos falando de trepar a 1600 m d'altor, nun llugar ablucante, onde por muncho calor que faiga pel valle, taremos fresquinos... pero como siempre... respetái que tamos n'Asturies y esto hai que caltenelo en condiciones.

miércoles, 3 de enero de 2018

Trail Villaviciosa (Villaviciosa) - Santolaya (Cabranes)

 18 d'Avientu de 2017

Track: Trail Villaviciosa (Villaviciosa) - Santolaya (Cabranes)


Web del Trail: Trail Villaviciosa - Santolaya

Clasificaciones: Clasificaciones 2017  


Un añu más, vuelvo a tierres sidreres pa correr nel trail que xune les capitales de la Villa y Santolaya. Esti añu, con camudu nel percorríu, ganábense unos quinientos metros de desnivel más y un par de kilometrinos en distancia, anque eso nun fué lo más importante de cara a los tiempos col añu pasáu... sinon les cantidaes ensin xacíu de barru nel trayeutu.

Venga... que ya daba igual too

A tou esto, nun ye que ficiera d'aida tener que correr con unos playeros que quéndeme pequeños y con paécenme unes madreñes dafechu. Aún asína, nun lo ficimos mal del tou y anque apretamos de más na nueva xubida pa caltener ritmos pudimos durante tola carrera aguntar la posición ya incluso ganar dalguna al fina.

A la idega de la organización, de quitanos dellos kilómetros d'asfaltu lo cual ye mui d'agradecer, l'ascensión inicial ye mui correndera y resta fuercies pal restu del percorríu, lo cual fai ganar enteros montañéramente falando.

Esfrutando del barrizal a sacu


Llueu tocaba metese na baxada hasta los molinos del Profundu, onde metíeste nel infiernu del barru, con patinaes continues, pero con una pasada de niveles d'agua nel calce del ríu, pudiendo esfrutar de vadeos con agua hasta les rodiyes y tabayones pequeños, medianos y nel caberu molín... ablucantes.

Darréu, tocaba l'ascensión hacia Peña Cabrera onde fízose duro enforma la cantidá de barru, que facía un infiernu avanzar pasu ente pasu. Llibráu esto, con munchísimu esfuerzu, descensu per pista cenciella y un caberu entepechu que nun lo alcordaba tan duro... notábase que díbemos pelín tocaos por mor de la dureza y pesadez del barru.

Meta un añu más en Santolaya


Y pa finar, como non... nun día soleyeru enforma, lo cual faise importante nestes feches, pudimos esfrutar d'un tranquilu vermú en Santolaya y d'una fartura de fabes y arroz con llechi, qu'amatagáben l'esfuerzu de les 2 hores y 47 minutinos de carrera, quedando'l 25 na xeneral y el 6º na mió categoria.

Como siempre.. un placer corretiar pentes ríos, viesques y con una meteo que paez que la tienen asegurada... al menos nos dos años que llevo esfrutrando d'esti trail. Mil gracies a los fotógrafos (Álvaro Postigo, Juan Luis Malgor...), a los voluntarios y a los organizadores por esta carrerina tan prestosa.
------------------------------------------------------------------------------

viernes, 29 de diciembre de 2017

L'Altu la Farrapona (Somiedu) - Picu Blancu

26 de Payares de 2017

Track: L'Altu la Farrapona (Somiedu) - Picu Blancu


En toles rutes, siempre comento cual ye'l nuesu puntu de partida y como se llega hasta'l llugar, pero nesti día nun pudimos llegar hasta la Farrapona pola xelada na ñeve, jeje. De toes formes, ya sabéis que dende Xixón tenéis que garrar l'autovía "Y" en direición Uviéu pa siguir dempués pela As-63, hasta la salida de Cangas del Narcea. Equí tomaremos la As-15, travesando parte del conceyu de Salas y entraremos nel conceyu de Miranda, siguiendo pola As-227 hasta l'entamu del conceyu de Somiedu, Aguamestas.

Dende Auguasmestas pasaremos pelos pueblos de Xadriz, La Riera, Recueva y Castru, onde nel banzáu de la Malva, salimos pela SD-1, entamando camín pel val.le Saliencia, pasando per Veigas, Vil.larín, Arbeyales, Éndriga y Saliencia, onde facemos los restantes kilómetros hasta L'Altu La Farrapona o dellos cientos metros enantes, jeje.

Partimos del Altu La Farrapona (1707 m)

martes, 19 de diciembre de 2017

Trail Tierras Pésicas (Cangas del Narcea)

19 de Payares de 2017

Track: Tierras Pésicas (Cangas del Narcea)


Web del Trail: Trail Tierras Pésicas

Clasificaciones: Clasificaciones 2017 


Magar del descansu, más que necesariu, d'un par de mesinos llueu de correr la maratón de Güeyinos del Diablu, tornábamos a l'aición en tierras pésicas, ye dicir, en tierres de los antiguos pobladores del suroccidente astur.

Madrugaremos un güevu, Carlinos y yo, conduciendo pente rises y temperatures baxísimes hasta la capital del vinu del país. Asomaremos el focicu fuera'l coche y de retrucu, quítense les ganes de too, pero sobretou de pensar en ponese pantalón curtiu y correr los 26 km con 3100 m de desnivel que tien el trail.

Esperando al últimu momentu pa mudanos de ropa... vaya rasca

Dempués de garrar el dorsal, tomar un cafetín y remolonear pa nun dir a mudase la ropa y quitar el plumes y el gorru, preparámonos nel coche y axuntámonos tolos corredores, pente saltinos y calecer de manes na meta.

Como tamos en tierra de pólvora, tenemos la cuenta atrás a base de voladores y salimos peles cais de Cangas baxando hacia la puente sol ríu Naviego y entamaremos l'ascensu hacia la capiya del Pandu, pa descender dempués peles viñes, lo que da un toque bien prestosu al correr.

Dende los primeros kilómetros mui correndera

Tocará pasar de nuevu per Cangas, col entepechu de la cai Arrastraculos hacia la meta y dempués d'echar un tragu y xintar dalgo, siguimos avance hacia la gran ascensión del día, que nun ye otro que los casi 800 m de desnivel hasta L'Acebu.

Ye un tarrén de tramu pindiu al entamu, pa llueu pasar a pistes correnderes cruciando en dellos puntos cola carretera, pitándonos y animándonos los coches que xuben a animar hasta riba. Tamién, fue un puntazu la descarga de salida pal trail cortu... equí si qu'echaron el restu jajaja... vaya tronada de voladores.

Xubides pindies pal Acebo y llegando a Cangas

La parte final hasta'l santuariu ye al traviés d'un cortafueos con una pendiente totalmente continua ensin descansu que pone a preba l'estáu físicu de los corredores. Nesti puntu, alcuéntrome con Wifre, un collaciu que ye un titán corriendo ultras charrando un ratín xuntos pa siguir caún el so camín.

Aporto al avituallamientu, onde xinto daqué y toca tirase cuesta abaxo, a lo xole per cortafueos pa pasar a una pista rapidísima, alternando con dalgún tramu más téunicu pegaos a la riega de los Fondones hasta aportar al Pontón.

Descensos rápidos y cenciellos na so mayor parte

Equí, ya tocará facer l'ascensión final, mui pindia, que pon les pates a fundir hasta enllazar na ermita de Santana col mesmu camín pel que baxáremos nel otru pasu per Cangas. Como non, l'últimu tramu de caleyéu cola ascensión pela Arrastraculos faise pelín infernal pa dempués de 25 km y unos ritmos de 6 min y mediu'l kilómetru.

A la fín, posición 41 na xeneral y 24 en senior, lo cual diz que fue bona carrera, anque como se ve nos ritmos ye mui correndera pal mió estilu, lo que nun quite que me prestara munchísimu'l percorríu y el bon ambiente y organización.


Final con un solín bien prestosu y munchu tiempu pa vermutiar

Pa nota, aparte del tema organizativu, con duchina caliente, abundancia nos avituallamientos, voluntarios animando tol tiempu... dicir que cada día presta más quedase a xintar tolos corredores y compartir mesa entre rises y cares de cansanciu.

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Pedro Pablo Heres, Marisol Azkárate, Asociación Cultural de Mual, Mariaw...) 

viernes, 15 de diciembre de 2017

Entragu - Pena Gradura (Teberga)

Branu 2017

Si ya ficiera un adelantu, de los munchos díes que pasé per Teberga esti branu, cola entrada de la fastera de la Pena Sobia, pa la fastera de la Pena Gradura, dediquéme a conocer tolos seutores nos que'l mió nivel d'escalada ye a movese.

La verdá ye que tenemos un mundu calizu n'Asturies y en Teberga, en concretu, pa ser un referente mundial, pero muncho meyor que la xente diga, fai fríu, siempre ta lloviendo.... menos xente. Anque, los últimos años ya se va viendo dalgo de masificación nel aparcaderu, sobretou en Xunetu y Agostu.

En Bóvedas con un ambiente de rises y apretaes tremendu

Dicir, que nun too ye escaladores, hai ciclistes, btteros, montañeros, senderistes y autocaravanistes, que simplemente saben que l'abellugu nel aparcaderu ye'l más afayaizu de tolos del Estáu. Poro, xente, hai que ser xenerosos, que los baños y la duchina nun se llimpien solos.

No qu'al deporte refiérse, podemos entamar per un seutor que namoróme casi dende'l primer día: Entecampos. Esti paré, asitiáu a la manzorga de la foz de Valdezreizales, dixébrase en tres seutores: superior, mediu ya inferior.

Descansando na xubida a Bóvedas per Paré Negra

Nós tuviemos trepando nel mediu, destacando los encadenes de la Doble J (7a+), La Tijeruca (7a/+), Waikiki (6c) y Diábolo (6c+) y unos mui bonos pegues a Entetantos (7b/+) que queda como proyeutu de xubir grau.

Embaxo del seutor inferior d'Entecampos, tenemos la Esplanada y el Tunelín, onde alcuéntrense obres maestres de la placa. Nun pude meteme en graos curiosos, pero cayó dalguna plaquina mui prestosa como la Willy (6c) y la Woman del Callao (6b+/c).

Unes vegaes trepando nel Río

Dalgún día tuviemos tamién pel Eléctricu, anque ensín dengun encadene que destacar, namás quiciás un Verano Tebergano con munchos metros de bona caliza xuntando dos llargos mui prestosos. Igualmente, pasamos per Cabra Muerta destacando un 6c cortín como ye Grifa de Tarifa.

Y dende estos sectorinos, pasamos a ún de los requexos más guapos de Valdezreizales, como ye Bóvedas, cola so forma mítica del Grito de Munch. Equí axúntense tres cuevones onde les víes de chorrera son una delicia y pa los que nun mos canteamos tou un retu.

Otres descansando con Kílina

Al final, acabamos por pillá-y el puntu al asuntu y ficimos dos versiones curties de 6c de les dures víes Bombé Violent y Dragón de Comorr, a la que sumamos pal bolsiellu tamién la versión curtia tamién de la Forres que te corres (7a) al tercer pegue.

Tou esto na bóveda de la manzorga y na de la mandrecha abaxo, tuviemos trabayando tola fastera plaquera, na qu'enchufamos a vista tolo escalable pa mín, destacando el Patán (6b+) y Ladilla nel deseo (6c)... ablucantes ambes.

Faciendo dalgo pela esplanada

Per últimu, tuviemos nel seutor de "moda", de moda porque nel branu siempre se ta fresquín, y qu'acabará siendo un clásicu pero que necesita muncho rodaxe y munches escalaes, ya que la roca ta rotina, sobretou nes víes de la manzorga.

Namás que tuve un par de díes faciendo los dos víes más cencielles: Caminos Paralelos (6b+) y Holkus Polkus (6c) les dos a vista, pero con esi calter rotu costábame tener ganes de meteme en hestories más apretones.

La perdura vida nel aparcaderu d'Entragu

En resume, aparte de les visites obligaes de findes y puentes, reservaré siempre que pueda unos diez díes al añu p'apalancame nel aparcaderu d'Entragu en Teberga ya hinchame a facer víes, tomar birres cola collación d'escaladores y esfrutar del bon rollito teberganu.

Mil gracies a Carla Huélamo poles semeyes y tola xente que conocí nesos díes y que tanta motivación esguiladora gastaben, al igual que de tar de folixa tamién, jeje... una selmana nel cielu calizu.

Entragu - Pena Gradura (Teberga)
Croquis modificaos por mi de la escuela d'escalada de Entragu, alcontraos en La noche del Loro, el Club Aguja de Sobia, Desnivel del añu del tabacu... Gracies y col so permisu.


-----------------------------------------------------------------------------

jueves, 30 de noviembre de 2017

El Fielato (Ayer) - Fuentes - Cuerda L'Eyu - Tonéu

28 d'Ochobre de 2017

Track: El Fielato (Ayer) - Fuentes - Cuerda L'Ayu - Tonéu


Ruta del GM Xuan de la Borrina propuesta por Haritz, al que-y llegó un pelín d'oyíes que ya la tenía na tiesta dende cuantayá. Ye dicir, teníala pendiente en mou ivernal, pudiendo atalantar nel intre, que yera un auténtica xatada pero con un calter imporante d'esfuerzu y dependiendo les condiciones casi d'aventura.

El casu ye que pal grupu, ye una auténtica barbaridá facer esti cordal del Ayu (Eyu) n'ivernal, pero sí que ye una bona ruta ensin ñeve pa conocer unos cuantos dosmiles ayeranos. Poro, empobinámonos hasta'l Fielato, al entamu del Puirtu Braña, pa intentar percorrer dende'l Picu Fuentes hasta'l Tonéu tola cuerda L'Ayu.

Partimos d'El Fielato (1268 m)

lunes, 20 de noviembre de 2017

Entragu - Pena Sobia (Teberga)

Branu 2017

Esti branu, tengo que dicir, que fue mi confirmación escaladora nes grandes escueles asturianes, ye dicir, Quirós y Teberga sobretoo. Pesie a entamar a esguilar en Quirós fae unos añinos, la verdá ye que siempre me prestaron más les escuelines pequeñes, llocales y nes que siempre tabes, más menos, sólo o con mui poques cordaes.

Munchos fueron los díes nos que tuve d'un seutor a otru, poro tocará facer un pocu de resume, entamando pela fastera de la Pena Sobia n'Entragu. Equí, pel momentu, namás que conocía el seutor de la Depuradora, quiciás l'únicu seutor de Teberga que puede considerase d'aniciación.


Día de bautismu en roca con collacios del Indoorwall

Na Depuradora, tenía feches toles víes cencielles y nun par de visites más pudi afondar en graos muncho más curiosinos, destacando Master 40, un 6b+ con un pasu perrísimu y sobretou Paisanos Motivaos que si xuntamos los dos llargos queda un viote de 40 metrazos de 6c pa quedar bien contentu de la trepada.

Tamién tenemos un par de 6a+ apretones, siendo un d'ellos, una variante de Garrote Vil, un 7a+ que tengo munches ganes de probar y si tuviera que destacar una vía de les que probé, quédome con 37 grados, un 6c+/7a impresionante, con tramos d'escalada de babaresa al entamu, placa increyible dempués, un pasín de bloque y unos cuantos metros finales de bon cantu y aguantar que son una delicia.

Conociendo la Cova Negra... bon seutor pero que necesita un reequipáu

Pa más rises, otru día, con una resaca perimportante, tuviemos conociendo un seutor antiguu que pelín penriba de la Depuradora, nomáu como Cova Negra. La verdá ye que nun pude probar gran cosa, porque tuve más tiempu faciendo les víes cencielles de la parte alta de la Depuradora, pa qu'unos collacios qu'entrenen nel Indoorwall fueran fogueándose, pero otros collacios sí que tuvieron metíos nelles.

Dicir, que ye un seutor pelín escaecíu y la equipación ye de la dómina pasada, con anclaxes dudosos, alloñes de meter mieu y lo pior, los descuelgues nun tan casi nin pa recomendar metese. Habrá que dir probando dalguna más pa ver si paga la pena metese a trabayar duro nesti seutor, porque víes llargues y con bona pinta vimos... pero hai qu'andar fino y lo de volar... con cuidadín.

La Depuradora y catando la plaquina d'Esto da pa mucho  (6a+)

Supongo que llegada la temporada ivernal, la Depuradora sedrá un tarrén de xuegu estupendo en díes soleyeros, poro tornaremos per equí a metese en coses series y tamién a dir quitando dalgun sestu por ahí que quédanos pendiente de probar.

Pena Sobia (Teberga)
Croquis modificaos por mi de la escuela d'escalada de La Depuradora, por mor del GM Aguja de Sobia: La Depuradora. Gracies y col so permisu.


 --------------------------------------------------------------------

miércoles, 15 de noviembre de 2017

Peña Cabecín (Casu)

Branu 2017

Los que me conocen bien, saben de la mió afición a conocer escueles d'escalada más perdíes, menos frecuentaes pola mayoría los escaladores y onde poder tar bien a gustu. Hai que dicir qu'esti añu, adentréme muncho nel mundiu esguilador, conociendo a munchísima xente y trepando y pasando bonos momentos con tola xente.

Poro, pesie a moveme munchos díes nes grandes escueles de Teberga y Quirós, nun quita pa fuera dellos díes a una escuela a la que-y tenía ganes enforma: Peña Cabecín. Nun vos suena? Pues ye lo normal, ya qu'esta escuelina ye conocida como la Marea, pero a dicir verdá les parés tan na Peña Cabecín y na so faldera ta'l pequeñu pueblín de Cabecín.. asína que vamos da-y el nome que se merez.

Accesu hacia la escuela del Cabecín

Va años, ya intentáremos trepar nesta escuela y nun fuéramos más que de paséu nun día gafu, alcontrando casi de milagru dalgunos de los seutores na fastera principal de la escuela. Otru día de primavera d'esti añu, volvía a dar un paséu con dellos collacios alcontrando un seutor non reseñáu y dándo-y la vuelta dempués a la peña pa conocer Les Cueves, Máximo, Truli y el Rasta, ya inclusu xubir hasta la Cuevona.

A la fín, un mes más tarde, volvimos per ellí un sábadu pa trepar durante la mañana nel seutor del Truli, onde alcontrámonos con unes cuantes víes cencielles con una escalada peragradable, catando a la fín esti requexu de caliza casina, anque frecuentada pola xente de L'Infiestu.

Canalizu de baxada pente'l Rasta y Máximo

Aquel día, tan sólo pudimos meté-y man a esti seutor y quedóme hasta un 6b+ perrísimu por encadenar, pero púnxose a orbayar y tocó descubrir un pueblu y un chigre que naide debe perdese enxamás: el del Tozu.

La verdá, ye que quedamos namoraos del pueblín y del chigre, con una terraza a mou de merenderu onde si'l día acompaña tien de ser una maraviya ver l'atapecer. Ya nun falamos de la xente que lu lleva y del bon ambiente qu'había pente la xente vieyo del pueblu y la xente foriata.

Cuevona y trepando nel Truli

Con estes blimes, taba claro, que tenía que volver un finde enteru y pa ello garramos les furgos y plantámonos nel Tozu tol finde, cenando nel chigre un par de díes estupendamente. Nun tengo más que bones pallabres pal tratu que nos dieron y la única pega, nun tener un llugar más afayaizu nel pueblu onde asitiase de furgonetéu, ya que na mesma plaza paez que moléstase un pelín a los vecinos.

No que la escalada se refier, probamos víes el primer día nel seutor Cuevines, onde me paez que ta la mayor calidá y tamién dureza de la escuela y l'últimu día, con un calor ya pelín insoportable,  pasamos la mañana nel Rasta, na que probamos un par de 6b's duretes de coyones, na mandrecha'l seutor.

El Tozu... un pueblín con encantu y un chigre de primera

Ensín más, quedé con ganes esti branu de pasar en grupu un finde ellí, pero bono... ocasión tendremos porque como digo, la escuelina y el bon ambiente nel Tozu, fai que pague la pena ensin dubia.

Peña Cabecín
Croquis modificaos por mi de la escuela d'escalada del Cabecín, por mor del GM Vízcares y  Piratas Free. Gracies y col so permisu.

viernes, 10 de noviembre de 2017

H.uentedé (Camaleñu) - Hacheru - Peña Vieya - Vidrio - Áliva

1 d'Ochobre de 2017

Track: H.uentedé (Camaleñu) - Hacheru - Peña Vieya - Vidrio - Áliva


Día de recuentros, con collacios, col monte, coles carreres, conmigo mesmu... Y nun ye quiciabes siquiera fuera la ruta que pensaba que diba devolvéme la ilusión por dir de monte, ya que a la Peña Vieya ya xubiera nuna travesera, pero siento que l'actividá que fice tornó a llenáme como nun me llenaren anteriores salides pel monte.

Poder amestar l'esfuerzu, la soledá y el disfrute personal de la carrera pel monte, con xuntame más tarde cola xente del GM Xuan de la Borrina (Benjamín, gracies por animate, nunca falles) y cola mió xente del Baskonia a los que téngo-yos un apreciu brutal, fué una pasada.

Alborecíemos, Kíla y yo, nel aparcaderu de Potes, dempués d'una xornada d'escalada en La Hermida col envís de dir empobinándonos hacia H.uentedé. De camín, tuve a bien parar un ratín a almorzar nel hostal Remoña n'Espinama y de pasu a mercar un bocata pa la ruta.

Dende H.uentedé vista de lo que vamos xubir corriendo